Naannoo Harariitti Karooraan Hojii Bu’a Qabeessa Tajaajilu Akka Raawwatamu Ni Tajasifama – Bulchaa Ordiin Badrii

Godina Baaleetti Misooma Dammaa Cimsuuf Qonnaan Bultootaaf Gaagura Ammayyaa Raabsamaa Jira

Hagayya 26/2017 (Milkitech) – Naannoo Oromiyaa, Godina Baalee keessatti qabeenya uumamaa jiru fayyadamuun misooma dammaa guddisuuf mootummaan qonnaan bultootaaf gaagura ammayyaa gatii madaalawaan raabsaa jira.

Dursa Garee Misooma Dammaa Waajjira Qonnaa Godina Baalee, Obbo Lataa Itichaa, akka jedhanitti, godinicha keessatti innisheetivoota misooma dammaa jabeessuu fi babal’isuuf hojii bal’aan hojjetamaa jira. Bara bajataa kana qofa keessatti, qonnaan bultootaaf gaagura ammayyaa kuma 85 ol raabsuun bu’aa dammarraa argamu guddisuuf qophii taasifameera.

Obbo Lataan akka ibsanitti, baatiiwwan lamaan darban keessatti qonnaan bultootaaf gaagura ammayyaa kuma 4 ol raabsuun hojiin misooma dammaa saffisaan gaggeeffamaa jira. Kana dura, yeroo innisheetivichi bifa haaraan eegalu, gaagura mala aadaatiin qonnaan bultootni fayyadaman harka caalaa xiqqaa — kuma 20 ol utuu hin taane turu himaniiru. Haa ta’u malee, bara bajataa darbe qofa keessatti, gaagura ammayyaa kuma 82 ol raabsamuu fi bu’aan misoomichaa saffisaan ol guddachaa dhufuu ibsaniiru.

Gama biraatiin, galiin misooma dammaa waggaa tokko keessatti duraan tooniin kuma lama qofa ta’uu ibsanii, amma garuu galiin kun tooniin kuma jahaa ol ga’uu himee jiru. Bara bajataa haaraa keessatti ammoo galiin kun gara tooniin kuma saddeetiitti akka guddatu karoorfamee hojjetamaa jira. Baatiiwwan lamaan darban qofa keessatti, misooma dammaa tooniin kuma 1 fi 700 ol walitti qabamuu odeeffannoon agarsiisa.

Qonnaan bultoota misooma dammaarratti hirmaatan kumaatamaan lakka’aman keessatti, leenjii ijaarsa dandeettii qonnaan bultoota 17,000 ol ta’anitti kennamuun misoomni kun akka ciminaan itti fufu hubachiisameera.

Qonnaan bultoota keessaa, jiraataan Aanaa Barbaree Kadir Mahaammad akka jedhanitti, erga mootummaan gaagura ammayyaa gatii madaalawaan kennuu jalqabee booda, galii dabalataa argachuun jireenyi isaanii daran fooyya’aa dhufee jira. Akkasumas, Abdallaa Hasanooti immoo “midhaan qofa osoo hin taane, misooma dammaa irratti hirmaachuun galii gurgurtaarraa arganneen maatii keenya tasgabbeessinee jirra” jechuun haala bu’aa inni fide ibsaniiru.

Odeeffannoon Waajjira Qonnaa Godina Baalee irraa argame akka agarsiisutti, bara bajataa darbe xumurametti qonnaan bultootaaf gaagura ammayyaa kuma 82 ol gatii madaalawaan raabsamuu mirkaneeffameera